İşğaldan azad olunmuş ərazilərə səfər edənlərin sayı artıb

141

Əsas Xəbərlər

15 Iyul, 2025

Azərbaycan vətəndaşlarının işğaldan azad olunmuş ərazilərə səfərləri davam etdirilir. Səfərlər müntəzəm avtobus reysləri, eləcə də fərdi nəqliyyat vasitələri ilə həyata keçirilir.

Müntəzəm avtobus reysləri ilə biletlər onlayn qaydada https://biletim.az/ portalı üzərindən əldə edilir. Bu ilin 6 ayı ərzində işğaldan azad olunmuş ərazilərə müntəzəm avtobus marşrutları ilə 3475 reys həyata keçirilib, 33 min 500 sərnişin həmin əraziləri ziyarət edib.

Fərdi minik avtomobillərilə isə vətəndaşlar www.yolumuzqarabaga.az portalında qeydiyyatdan keçərək Şuşa, Laçın, Xankəndi, Xocalı, Xocavənd, Ağdərə, Ağdam, Füzuli, Cəbrayıl, Zəngilan və Suqovuşan istiqamətlərində səfər edə bilirlər. Bu ilin 6 ayı ərzində işğaldan azad olunmuş ərazilərə fərdi minik avtomobilləri ilə səfər etmək üçün müraciət edən 1 milyon 342 min 921 nəfərə portal üzərindən icazə verilib. Bu rəqəm ötən ilin ümumi göstəricisi ilə müqayisədə 2 dəfədən çoxdur. Belə ki, 2024-cü ildə portal üzərindən müraciət edən 647 min 918 nəfərə icazə verilmişdir.

Xəbəri sosial platformalarda paylaş: